ដើម្បីធានាដំណើរការនៃការជ្រើសរើសនិស្សិតចូលរៀននៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ប្រកបដោយតម្លាភាព សមធម៌ គុណភាព សមត្ថភាព និងស្របតាមប្រកាសស្តីពីបទបញ្ជាជ្រើសរើសនិស្សិតឲ្យចូលរៀននៅក្នុងគ្រឹះស្ថានឧត្តមសិក្សា សាកលវិទ្យាល័យបានដាក់ចេញនូវគោលការណ៍ជ្រើសរើសនិស្សិត ដែលមានខ្លឹមសារដូចខាងក្រោម៖

ប្រការ១

• គោលការណ៍នេះ មានគោលបំណងធានានូវការជ្រើសរើសនិស្សិតឲ្យចូលរៀនគ្រប់កម្រិតជំនាញដែលកំពុងបណ្តុះបណ្តាលនៅ ស.ភ.ន.វ.ស ប្រកបដោយតម្លាភាព និង     គុណភាព។

ប្រការ២

• គោលការណ៍នេះ មានគោលដៅកំណត់ លក្ខខណ្ឌជ្រើសរើសនិស្សិតចូលរៀននៅថ្នាក់បរិញ្ញាបត្រ និងថ្នាក់ក្រោយបរិញ្ញាបត្រនៅ ស.ភ.ន.វ.ស ។

ប្រការ៣

• គោលការណ៍នេះ មានវិសាលភាពអនុវត្តចំពោះនិស្សិតនៃ ស.ភ.ន.វ.ស។

ប្រការ៤

• ការចូលសិក្សានៅថ្នាក់ឆ្នាំសិក្សាមូលដ្ឋាន (ឆ្នាំទី១)
• បេក្ខជនត្រូវមានសញ្ញាបត្រមធ្យមសិក្សាទុតិយភូមិ ឬសញ្ញាបត្រមានតម្លៃស្មើ ដោយឡែកបេក្ខជនដែលមានសញ្ញាបត្រមធ្យមសិក្សាទុតិយភូមិមុនឆ្នាំ២០០២ ត្រូវឆ្លងកាត់ការប្រឡងជ្រើសរើស
• និស្សិតអាហារូបករណ៍ត្រូវបានជ្រើសរើសដោយក្រសួងអប់រំ យុវជន និងកីឡា
• និស្សិតបង់ថ្លៃត្រូវបានជ្រើសរើសដោយ ស.ភ.ន.វ.ស។

ប្រការ៥

• ការរៀនសិក្សានៅថ្នាក់បរិញ្ញាបត្រ (ឆ្នាំទី២ ទី៣ និងទី៤)
• បេក្ខជនត្រូវមានវិញ្ញាបនបត្រថ្នាក់ឆ្នាំសិក្សាមូលដ្ឋាន ឬសញ្ញាបត្រមានតម្លៃស្មើ (ទទួលស្គាល់ជាផ្លូវការដោយក្រសួងអប់រំ យុវជន និងកីឡា)
• និស្សិតអាចបន្តការសិក្សានៅឆ្នាំបន្តបន្ទាប់បាន លុះត្រាបានមធ្យមភាគនៃនិទ្ទេសប្រចាំឆ្នាំ (GPA) ស្មើ ឬលើស ២.០០។

ប្រការ៦
១. ចំពោះការសិក្សានៅឆ្នាំទី១

• បេក្ខជនត្រូវមានសញ្ញាបត្របរិញ្ញាបត្រ ឬសញ្ញាបត្រមានតម្លៃស្មើ (មានការទទួលស្គាល់ផ្លូវការដោយក្រសួងអប់រំ យុវជន និងកីឡា) ស្របតាមជំនាញសិក្សា។ ដោយឡែក បេក្ខជនដែលមានសញ្ញាបត្របរិញ្ញាបត្រ ឬសញ្ញាបត្រមានតម្លៃស្មើ (ខុសជំនាញ) និងមានបរិញ្ញាបត្ររង (ត្រូវជំនាញ) អាចចូលសិក្សានៅឆ្នាំទី១តែម្តង ចំណែកឯ បេក្ខជនដែលមានសញ្ញាបត្របរិញ្ញាបត្រ ឬសញ្ញាបត្រមានតម្លៃស្មើ (ខុសជំនាញ) ត្រូវរៀនត្រៀម១វគ្គ (រយៈពេល៤ខែ) ទើបអាចបន្តការសិក្សានៅឆ្នាំទី១បាន។
• បេក្ខជន ត្រូវឆ្លងកាត់ការប្រឡងជ្រើសរើស។

២. ចំពោះការបន្តការសិក្សានៅឆ្នាំទី២

• និស្សិតអាចបន្តការសិក្សានៅឆ្នាំទី២បាន លុះត្រាបានមធ្យមភាគនៃនិទ្ទេសប្រចាំឆ្នាំ (GPA) ស្មើ ឬលើស ២.៥០ ហើយគ្មានពិន្ទុនៃមុខវិជ្ជាណាមួយទាបជាង ៦០/១០០។

ប្រការ៧

• រយៈពេលចុះឈ្មោះចូលរៀន មិនលើសពី៣០ថ្ងៃ គិតពីថ្ងៃប្រកាសឲ្យចុះឈ្មោះចូលរៀន។

ប្រការ៨

• សម្រាប់ថ្នាក់បរិញ្ញាបត្រ និស្សិតអាចផ្ទេរការសិក្សាពីគ្រឹះស្ថានឧត្តមសិក្សាផ្សេង នៅឆ្នាំទី២ និងទី៣ (ត្រូវរៀនបន្ថែមមុខវិជ្ជាមួយចំនួនតាមជំនាញឯកទេស) ដោយឡែកនិស្សិតឆ្នាំទី៤ មិនអនុញ្ញាតឲ្យផ្ទេរការសិក្សាទេ
• ការផ្លាស់ប្តូរនិស្សិតឲ្យបន្តការសិក្សា ឬទទួលនិស្សិតពីសាកលវិទ្យាល័យនៅក្រៅប្រទេស អាស្រ័យលើកិច្ចព្រមព្រៀងរវាងសាកលវិទ្យាល័យទាំងនោះ និង ស.ភ.ន.វ.ស។

ប្រការ៩

• ការសិក្សាបរិញ្ញាបត្រសិក្សាជាភាសាបរទេស
• បេក្ខជនត្រូវមានវិញ្ញាបនបត្រថ្នាក់ឆ្នាំសិក្សាមូលដ្នានស្របជំនាញ ឬបរិញ្ញាបត្រ ឬបរិញ្ញាបត្រជាន់ខ្ពស់ ឬសញ្ញាបត្រ បណ្ឌិត ឬសញ្ញាបត្រមានតម្លៃស្មើ (ទទួលស្គាល់ជាផ្លូវការដោយក្រសួងអប់រំ យុវជន និងកីឡា)
• និស្សិតត្រូវឆ្លងកាត់ការប្រឡងជ្រើសរើស។

ប្រការ១០

• គោលការណ៍នេះ មានប្រសិទ្ធភាពអនុវត្តចាប់ពីថ្ងៃចុះហត្ថលេខាតទៅ។