សារពីព្រឹទ្ធបុរស
ក្នុងនាមមហាវិទ្យាល័យនីតិសាស្រ្ត នៃសាកលវិទ្យាល័យភូមិន្ទនីតិសាស្រ្ត និង វិទ្យាសាស្រ្តសេដ្ឋកិច្ច ហៅកាត់ថា ស.ភ.ន.វ.ស ខ្ញុំសូមគោរពសម្តែងនូវការស្វាគមន៍យ៉ាងកក់ក្តៅ និងដោយសេចក្តីសោមនស្សរីករាយឥតឧបមាជូនចំពោះ ឯកឧត្តម លោកជំទាវ លោក លោកស្រី នាងកញ្ញា ទាំងអស់ដែលបានចូលមកកាន់គេហទំព័រនេះ ។
មហាវិទ្យាល័យនីតិសាស្រ្ត គឺជាមហាវិទ្យាល័យដ៏ធំមួយក្នុងចំណោមមហាវិទ្យាល័យទាំងបួននៃ ស.ភ.ន.វ.ស ដែលត្រូវបានបង្កើតឡើងតាំងពីឆ្នាំ១៩៤៩ ប្រកបដោយកិត្តិនាមដ៏ឧត្តុង្គឧត្តម ថ្លៃថ្លាជាមួយនឹងថាមពលក្នុងភាពប្រាកដនិយម សុទិដ្ឋិនិយម ការទទួលខុសត្រូវខ្ពស់លើការបណ្តុះបណ្តាលមូលធនខាងបញ្ញាក្នុងវិស័យច្បាប់យ៉ាងទូលំទូលាយ រួមបញ្ចូលនឹងការធានាឱ្យខានតែបាននូវនិរន្តរភាព កិត្យានុភាព ឈានមុខគេជាដរាបរៀងមកនៅក្នុងព្រះរាជាណាចក្រកម្ពុជារហូតមកដល់បច្ចុប្បន្ននេះ ។
ជាក់ស្តែង សាស្រ្តាចារ្យនៅមហាវិទ្យាល័យនីតិសាស្រ្ត គឺជាសាស្រ្តាចារ្យដែលមានចំណេះដឹងផ្នែកទ្រឹស្តីជ្រាលជ្រៅ មានជំនាញច្បាស់លាស់ រួមផ្សំជាមួយនឹងបច្ចេកទេសគរុកោសល្យខ្ពស់ ដែលអាចផ្តល់ឱ្យនិស្សិតមិនត្រឹមតែពុទ្ធិពីទ្រឹស្តីច្បាប់ប៉ុណ្ណោះទេ ថែមទាំងអាចចែករំលែកនូវបទពិសោធន៍ពីការអនុវត្តច្បាប់ជាក់ស្តែងក្នុងសង្គមទៀតផង។ ជាពិសេសទៅទៀត មហាវិទ្យាល័យនីតិសាស្រ្តមានបទពិសោធន៍យូរអង្វែងក្នុងការបណ្តុះបណ្តាលធនធានមនុស្សផ្នែកច្បាប់ប្រកបដោយសក្តានុពលខ្ពស់ និងមានកម្មវិធីសិក្សាដែលឆ្លើយតបទៅនឹងតម្រូវការទីផ្សារការងារសម្រាប់និស្សិតច្បាប់ ហេតុដូច្នេះហើយ ទើបយើងឃើញថា និស្សិតច្បាប់ដែលបានបញ្ចប់ការសិក្សានៅមហាវិទ្យាល័យនីតិសាស្រ្តជាច្រើនរូប កំពុងកាន់តំណែងសំខាន់ៗជាច្រើន នៅក្នុងជួរថ្នាក់ដឹកនាំនៃរាជរដ្ឋាភិបាល និងកំពុងបំពេញការងារផ្សេងៗនៅក្នុងវិស័យច្បាប់ រួមមានដូចជា ចៅក្រម ព្រះរាជអាជ្ញា មេធាវី សារការី អាជ្ញាសាលា ក្រឡាបញ្ជី មន្រ្តីរាជការតាមក្រសួងស្ថាប័នរដ្ឋ និង ធ្វើការនៅក្នុងវិស័យឯកជនផងដែរ ដូចជាតាមបណ្តាធនាគារ ក្រុមហ៊ុនផ្សេងៗ ជាដើម ។
ម្យ៉ាងវិញទៀត ក្នុងក្របខ័ណ្ឌនៃកិច្ចសហប្រតិបត្តិការជាមួយនឹងសាកលវិទ្យាល័យជាដៃគូនៅបរទេស ក្នុងមួយឆ្នាំៗ និស្សិតច្បាប់នៃមហាវិទ្យាល័យនីតិសាស្រ្តជាច្រើនរូបបានចូលរួមក្នុងកម្មវិធីផ្លាស់ប្តូរនិស្សិតជាមួយនឹងសាកលវិទ្យាល័យជាដៃគូ និងទទួលបានអាហារូបករណ៍ទៅបន្តការសិក្សានៅបណ្តាប្រទេសជាច្រើន ដូចជា ប្រទេសបារាំង ប្រទេសជប៉ុន ជាដើម ។ បន្ថែមពីលើនេះទៀត ដើម្បីជួយតម្រង់ទិសដល់និស្សិតច្បាប់ មហាវិទ្យាល័យនីតិសាស្រ្តរៀបចំបង្កើតឱ្យមានកម្មវិធីសិក្ខាសាលាជាបន្តបន្ទាប់ ក្នុងបំណងផ្តល់គំនិតជាមូលដ្ឋានសម្រាប់ឱ្យនិស្សិតច្បាប់អាចធ្វើការសម្រេចចិត្តដ៏ត្រឹមត្រូវ ក្នុងការឈោងចាប់យកវិជ្ជាជីវៈរបស់ខ្លួននាពេលអនាគត។
និយាយជារួម មហាវិទ្យាល័យនីតិសាស្រ្តយកចិត្តទុកដាក់ជាពិសេសជួយបណ្តុះបណ្តាលនិស្សិតច្បាប់ ដើម្បីត្រៀមលក្ខណៈទៅបំពេញអនាគតវិជ្ជាជីវៈច្បាប់ដែលជាក្តីស្រមៃរបស់និស្សិតម្នាក់ៗ ។
មុននឹងបញ្ចប់ ខ្ញុំសូមគោរពថ្លែងអំណរគុណយ៉ាងជ្រាលជ្រៅ ឯកឧត្តម លោកជំទាវ លោក លោកស្រី នាងកញ្ញា ដែលបានចំណាយពេលវេលាអានសារខាងលើនេះ ហើយខ្ញុំសង្ឃឹមជឿជាក់ថា ឯកឧត្តម លោកជំទាវ លោក លោកស្រី នាងកញ្ញា នឹងឆ្លៀតពេលវេលាបន្ថែមទៀតដើម្បីពិនិត្យមើលរាល់ព័ត៌មានផ្សេងៗដែលពាក់ព័ន្ធនឹងមហាវិទ្យាល័យនីតិសាស្រ្ត ព្រមទាំងកម្មវិធីសិក្សានៅមហាវិទ្យាល័យនីតិសាស្រ្ត ដើម្បីបានយល់ដឹងជាបន្ថែមទៀតនូវគុណភាព និង ភាពជោគជ័យនៃការបណ្តុះបណ្តាលធនធានមនុស្សផ្នែកច្បាប់។
លោក រុន ពណ្ណារិទ្ធ
ព្រឹទ្ធបុរស
