ពិធីការពារនិក្ខេបបទថ្នាក់បណ្ឌិតឯកទេសនីតិសាធារណៈ សហការរៀបចំដោយ University of French Polynesia (UPF) និងសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE/URDSE)

រាជធានីភ្នំពេញ៖ នារសៀលថ្ងៃទី២៣ ខែឧសភា ឆ្នាំ២០២៦ នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាសមាជិកគណៈកម្មការការពារនិក្ខេបបទថ្នាក់បណ្ឌិត បានអញ្ជើញជាអធិបតីក្នុងពិធីការពារនិក្ខេបបទថ្នាក់បណ្ឌិត ឯកទេសនីតិសាធារណៈ ក្រោមប្រធានបទ «ការវិភាគលើការគ្រប់គ្រងរដ្ឋបាលដែនដីនៅកម្ពុជា» ដោយបេក្ខជនបណ្ឌិត ថន វង្សសុវិទ្យា។ កម្មវិធីការពារនិក្ខេបបទថ្នាក់បណ្ឌិត គឺជាដំណាក់កាលចុងក្រោយ និងសំខាន់បំផុតសម្រាប់បេក្ខជនបណ្ឌិតក្នុងការបង្ហាញ និងការពារលទ្ធផលស្រាវជ្រាវជាសាធារណៈនៅចំពោះមុខគណៈកម្មការវាយតម្លៃ។

ពិធីការពារនិក្ខេបបទថ្នាក់បណ្ឌិតនេះ សហការរៀបចំដោយ University of French Polynesia (UPF) និងសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE/URDSE) ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា លោកស្រី TRAN Thi Anh-Dao តំណាងស្ថានទូតបារាំងប្រចាំកម្ពុជា ឯកឧត្តមបណ្ឌិតសាកលវិទ្យាធិការ សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច លោក អ៊ឹម ក្រាវង្ស តំណាងទីភ្នាក់ងារឧត្តមសិក្សាប្រើប្រាស់ភាសាបារាំងប្រចាំកម្ពុជា លោក Laurent Mesmann ប្រធានមជ្ឈមណ្ឌលសហប្រតិបត្តិការភាសាបារាំងប្រចាំ ស.ភ.ន.វ.ស. និងជាទីប្រឹក្សាពិសេសអមឯកឧត្តមសាកលវិទ្យាធិការ សាស្ត្រាចារ្យ Jean-Paul PASTOREL សាស្ត្រាចារ្យ Pascal VENNESSON លោក លោកស្រី គ្រូណែនាំ គ្រូឧទ្ទេស និងបេក្ខជនបណ្ឌិត ភ្ញៀវកិត្តិយសជាតិ និងអន្តរជាតិ។

សាកលវិទ្យាល័យ Polynésie française និងសាកលវិទ្យាល័យ Aix-Marseille បានរៀបចំពិធីការពារនិក្ខេបបទរបស់លោក ថន វង្សសុវិទ្យា ជាមន្ត្រីរាជការនៃរដ្ឋបាលថ្នាក់ក្រោមជាតិ ក្រោមប្រធានបទ «ការវិភាគលើការគ្រប់គ្រងរដ្ឋបាលដែនដីនៅកម្ពុជា» ក្រោមការដឹកនាំរបស់លោក Jean-Paul Pastorel សាស្ត្រាចារ្យនីតិសាធារណៈ ដែលបានប្រព្រឹត្តទៅនៅរាជធានីភ្នំពេញ កាលពីថ្ងៃទី២១ ខែឧសភា ឆ្នាំ២០២៦ កន្លងទៅ ដោយមានការចូលរួមពីសាស្ត្រាចារ្យវាយតម្លៃជនជាតិបារាំងចំនួន ៥រូប (២រូបអនឡាញ) និងសាស្ត្រាចារ្យវាយតម្លៃជនជាតិខ្មែរចំនួន ១រូប។ បន្ទាប់ពីរៀបចំពិធីការពារ និងការឆ្លើយសំណួរពីសំណាក់បេក្ខជនបណ្ឌិតរួចរាល់ ក្រុមសាស្ត្រាចារ្យបានសម្រេចផ្ដល់ងារ «បណ្ឌិត» ឯកទេសនីតិសាធារណៈ របស់ក្រសួងអប់រំជាន់ខ្ពស់នៃសាធារណរដ្ឋបារាំង ដល់លោក ថន វង្សសុវិទ្យា ដែលបានសរសេរនិក្ខេបបទ និងបានការពារនៅចំពោះមុខសាស្ត្រាចារ្យវាយតម្លៃ ប្រកបដោយជោគជ័យ។

ក្នុងឱកាសនោះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរចំពោះកិច្ចខិតខំប្រឹងប្រែងរបស់បេក្ខជនរហូតសម្រេចបានការសិក្សាស្រាវជ្រាវមួយដ៏មានសារៈសំខាន់ប្រកបដោយខ្លឹមសារ និងបានផ្ដល់នូវអនុសាសន៍គន្លឹះមួយចំនួន ដើម្បីពង្រឹងគុណភាពការស្រាវជ្រាវឱ្យកាន់តែមានឧត្តមភាព សម្រាប់ជាប្រយោជន៍ដល់ការអភិវឌ្ឍសង្គម និងសេដ្ឋកិច្ចជាតិ។ កម្មវិធីការពារនិក្ខេបបទថ្នាក់បណ្ឌិត ក្រោមកិច្ចសហប្រតិបត្តិការរវាង សាកលវិទ្យាល័យ University of French Polynesia (UPF) និងសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) គឺជាព្រឹត្តិការណ៍សិក្សាធិការកម្រិតខ្ពស់ ស្ថិតក្នុងគម្រោងសញ្ញាបត្ររួមគ្នា ឬការណែនាំរួមគ្នា ដែលអនុញ្ញាតឱ្យបេក្ខជនបណ្ឌិតទទួលបានការវាយតម្លៃជាអន្តរជាតិ និងទទួលបានសញ្ញាបត្រទទួលស្គាល់ទាំងនៅកម្ពុជា និងប្រព័ន្ធអប់រំកម្រិតខ្ពស់របស់បារាំង (តំបន់ប៉ូលីនេស៊ីបារាំង)៕

Warning: qtranxf_postsFilter(): Argument #2 ($query) must be passed by reference, value given in /home3/ruleeduk/public_html/wp-includes/class-wp-hook.php on line 341

Warning: qtranxf_postsFilter(): Argument #2 ($query) must be passed by reference, value given in /home3/ruleeduk/public_html/wp-includes/class-wp-hook.php on line 341

×

×